„Fólkið hafði bara gaman af þessu. Það var enginn hræddur,“ sagði Aðalgeir Bjarnason skipstjóri í samtali við Morgunblaðið.
Í gærkvöldi rak steypireyður sig í skutinn á skonnortunni Hildi sem var við hvalaskoðun á miðjum Skjálfandaflóa á vegum Norðursiglingar á Húsavík. Ekkert tjón varð, hvalinum virtist ekki verða meint af og enginn var í hættu að sögn Aðalgeirs.
Um þrjátíu erlendir ferðamenn voru um borð í skonnortunni þegar atvikið varð, segir í Morgunblaðinu í dag.