Lántakendur sem hafa ekki höfðað mál vegna endurútreikninga ólögmætra gengistryggðra lána þurfa ekki að örvænta að sögn Jóhannesar S. Ólafssonar, lögmanns hjá lögfræðistofunni Gengislán.is. Hann segir þá einstaklinga geta leitað réttar síns til ársins 2018, en í maí síðastliðnum samþykkti Alþingi breytingu á lögum um vexti og verðtryggingu, nr. 38/2001, þar sem kveðið er á um að fyrningarfrestur gengistryggðra lána verði átta ár. Fresturinn reiknast frá 16. júní árið 2010 og nær því til 16. júní árið 2018.
Lýsing tapaði tveimur málum fyrir héraðsdómi síðastliðinn þriðjudag sem lántakendur höfðuðu gegn fyrirtækinu vegna endurútreikninga ólögmætra lána. Málin voru rekin af lögmannsstofunni Gengislán.is og segir Jóhannes að ætla megi að um 80% af skjólstæðingum fyrirtækisins falli undir þessi fordæmi en erfitt sé að spá um það. Hann segir stofuna búna að stefna um 100 málum.
„Að okkar mati falla flest þeirra mála sem við höfum stefnt inn undir þessa dóma en þetta eru héraðsdómar, við eigum eftir að fá fleiri hæstaréttardóma,“ segir Jóhannes.
Þór Jónsson, upplýsingafulltrúi Lýsingar, segir það barnaskap að tala um fjöldatölur í þessum málum og bendir á að Lýsing hafi unnið öll mál fyrir hæstarétti sem snerta gengistryggingu frá árinu 2012, fimmtán talsins.
„Það er þó kannski skiljanlegt með hliðsjón af þeim rekstri sem hefur orðið til, þar sem ákveðin fyrirtæki hafa sérhæft sig í málum af þessu tagi og hafa hag af því að viðskiptavinir fjármálafyrirtækjanna telji sér nauðsynlegt að skipta við þau,“ segir Þór. Hann segir að ekki hafi enn verið tekin ákvörðun um hvort Lýsing áfrýi dómunum sem féllu á þriðjudag þar sem lögfræðiteymi þeirra sé að fara yfir málin.
„Þetta eru almennt flókin mál og það er verið að láta reyna á ýmiss konar tilvik fyrir dómum. Sum mál munu vinnast og önnur munu tapast, eins og gengur þegar verið er að leita leiðsagnar hjá dómstólum. Það er búið að skýra þessar stóru línur nú þegar og nú orðið verið að takast á um smærri tilbrigði þessara mála. Því hafa þau síður almennt for- dæmisgildi,“ segir Þór og bætir við að þær kröfur sem Lýsingu berist snúist jafnvel um að fá neikvæða vexti á lán. „Það þýðir ekki einungis það að þeir sem kröfurnar hafa uppi vilji ókeypis lán og greiða ekkert endurgjald fyrir þau heldur vilja þeir fá borgað með þeim. Það er eðlilegt að fjármálafyrirtæki spyrni við fótum þegar slíkar kröfur koma fram,“ segir Þór.
Í dómunum sem kveðnir voru upp á þriðjudag var talið að Lýsing hefði með endurútreikningi sínum reiknað sér viðbótarvexti af lánunum. Þá var álit dómsins að það stæði Lýsingu nær en lántakendum að bera þann vaxtamun sem hefði hlotist af ólögmætri gengistryggingu á umræddum vaxtagjalddögum lánsins. Lýsingu var því gert að greiða lántakendunum til baka þá viðbótarvexti sem fyrirtækið reiknaði sér.