Baráttuandi og bjartsýni voru orðin sem valin voru til að lýsa viðhorfi starfsmanna Rekstrarlands eftir stórbrunann í Skeifunni á sunnudagskvöld. Á aðeins fimm dögum tókst að finna nýtt húsnæði og koma verslun Rekstrarlands í stand. Formleg opnun var svo í hádeginu í dag og gleðin fölskvalaus.
Ákveðið var að bjóða starfsmönnum þeirra fyrirtækja sem urðu illa úti í brunanum í grill til að halda upp á opnunina. Einnig var slökkviliðsmönnum frá Slökkviliði höfuðborgarsvæðisins boðið en þeir gátu ekki mætt sökum útkalls í hádeginu.
Í samtali við mbl.is í gær sagði Samúel Guðmundsson, framkvæmdastjóri heildsölu- og rekstrarvörusviðs hjá Rekstrarlandi, að íslensk bjartsýni hefði verið að vopni og ómetanleg aðstoð góðs fólks.
Nýja verslunin er aðeins spölkorn frá þeirri sem brann, í Mörkinni 4. Samúel segir miklu hafa skipt að starfsfólkið fékk mikla hvatningu og stuðning frá viðskiptavinum í gegnum Facebook og í samtölum síðustu daga.
Frétt mbl.is: Opna aftur eftir brunann