Vegfarandi um Hvalvík náði í gær myndbandi af því þegar stærðarinnar aurskriða féll úr Árnesfjalli á Ströndum. Talið er hugsanlegt að skriðuföllin hafi geta byrjað vegna þess að klaki hafi sprengt fram. Björn Torfason bóndi á Melum sagði engu líkara en fjallið hefði hreinlega sprungið.
Eins og greint var frá á mbl.is í gær var vegurinn í Hvalvík lokaður stóran hlut gærdags eða þar til Vegagerðin hreinsaði skriðuna af honum um síðdegis. Þá sagði að talsverð skál sé í fjallinu, sem heimamenn töldu að gæti hafa verið full af vatni eftir rigningarnar undanfarna daga, en opnast og hleypt skriðunum af stað.
Á vefnum Litlahjalla segir hins vegar í dag að þegar Sverrir Guðbrandsson vegaverkstjóri, fréttamaður Litlahalla og fleiri fóru að skoða í sjónauka upp skriðurnar í fjallinu hafi sést greinileg klakastykki í grjóti og skriðunum „þannig að skriðuföllin hafa getað byrjað vegna að klaki hafi sprengt allt fram.“
Myndbandið að ofan tók Indriði Freyr Indriðason en kona hans er ættuð frá Víganesi og dvelja þau þar þessa dagana. Þau komust hvorki lönd né strönd í Hvalvíkinni í gær frekar en aðrir.
Frétt mbl.is: Eins og fjallið hefði sprungið