Ráðist var á mann á fertugsaldri í Rimahverfi um ellefuleytið í gærkvöldi. Maðurinn er með fjölmarga áverka en á annan tug ungra manna höfðu ráðist að honum og slegið hann með golfkylfum.
Samkvæmt upplýsingum frá lögreglunni á höfuðborgarsvæðinu var maðurinn með áverka víðsvegar um skrokkinn og blæddi í gegnum bol sem hann var í og einnig var hann með sprungna vör.
Drengirnir, sem allir voru farnir þegar lögregla kom á vettvang, höfðu einnig brotið rúðu í húsi sem maðurinn var við. Maðurinn var fluttur á slysadeild í lögreglubifreið.