Innlent | mbl | 1.8.2014 | 18:22 | Uppfært 20:23

„Hafði ekki áhrif á rannsóknina“

Hanna Birna hefur svarað spurningum Tryggva Gunnarssonar, umboðsmanns Alþingis

„Ég hef átt fjóra almenna fundi með lögreglustjóra á tímabilinu frá því framangreind rannsókn hófst í febrúar sl., en enginn þeirra var boðaður til að ræða rannsóknina sérstaklega,“ segir Hanna Birna Kristjánsdóttir, innanríkisráðherra í svari við bréfi umboðsmanns Alþingis í dag.

Tryggvi Gunnarsson umboðsmaður Alþingis ritaði á miðvikudaginn Hönnu Birnu Kristjánsdóttur bréf með ósk eftir tilteknum upplýsingum um samskipti hennar við Stefán Eiríksson, lögreglustjóra á höfuðborgarsvæðinu, vegna lögreglurannsóknar sem embætti hans vann að og beindist að meðferð trúnaðarupplýsinga í innanríkisráðuneytinu.

Á oft óformleg samskipti við undirstofnanir

Hanna Birna segir ráðherra eðli málsins samkvæmt reglulega eiga samskipti við forstöðumenn undirstofnana ráðuneytisins, oft og tíðum á óformlegum nótum, og sé því eins farið með lögreglustjórann á höfuðborgarsvæðinu. „Ekki er haldin skrá yfir þau samskipti og því er mér ekki unnt að leggja fram gögn til að upplýsa um tilvik þeirra.“

Hún segist hafa ásamt öðrum starfsmönnum ráðuneytisins gert allt í sínu valdi til þess að greiða fyrir rannsókninni og aldrei gert neitt til að hamla framgangi hennar. „Er raunar augljóst að hagsmunir mínir og annarra starfsmanna í ráðuneytinu hafa lotið að því að rannsóknin hefði greiðan framgang og gæti lokið sem allra fyrst.“

Spurði hvenær rannsókn lyki

„Í þeim tilvikum sem rannsóknina hefur borið á góma í samskiptum mínum við lögreglustjórann hefur það snúið að þeirri viðleitni ráðuneytisins að greiða fyrir rannsókn málsins.“ Þau tilvik segir hún snúa að öryggi gagna sem lögreglan hafi fengið aðgang að innan ráðuneytisins og hvenær þess mætti vænta að rannsókn lyki.

Hún segir þann langa tíma sem rannsóknin hafi tekið verið bagalegan og takmarkað möguleika hennar til að svara ítrekuðum árásum á opinberum vettvangi þar sem ekki sé við hæfi að ráðherra lögreglumála tjái sig opinberlega um yfirstandandi rannsókn.

Innti eftir því hvort samskiptin væru óviðeigandi

Þá tekur hún fram að hún hafi í samtölum við lögreglustjóra innt hann eftir því hvort honum þætti með einhverjum hætti óviðeigandi eða óþægilegt að hún ræddi við hann um framangreind atriði eða hvort samtölin væru til þess fallin að hamla störfum hans. „Kom fram að hans hálfu að svo væri ekki enda var honum ljóst að öll viðleitni mín í málinu laut að því að greiða fyrir framgangi rannsóknarinnar.“

Að lokum segir hún að ljóst sé af framangreindu að hún hafi á engum tímapunkti reynt að hafa áhrif á rannsóknina eða þá aðila sem henni stjórna.

Krafin um svör í kjölfar umfjöllunar DV

Umboðsmaður krafði Hönnu Birnu um svör í kjölfar umfjöllunar DV þar sem fullyrt var að Stefán hætti störfum sem lögreglustjóri vegna afskipta Hönnu Birnu af rannsókninni á lekanum úr innanríkisráðuneytinu.

Sjálfur hefur Stefán ekki viljað tjá sig um málið að öðru leyti en því að hann hætti ekki vegna þrýstings, eins og hann sagði í samtali við mbl.is. Hann hefur hinsvegar ekki viljað segja af eða á um það hvort innanríkisráðherra hafi haft afskipti af rannsókninni.

Hér að neðan má sjá svar Hönnu Birnu í heild sinni.