Rúmlega fimmtíu þúsund umsóknir fyrir um áttatíu þúsund kennitölur hafa borist til ríkisskattstjóra um leiðréttingu á höfuðstólslækkun verðtryggðra lána. Umsóknarfrestur rennur út þann 1. september næstkomandi, en opnað var fyrir umsóknir um miðjan maímánuð.
Í kjölfarið, þ.e. eftir 1. september, munu fyrstu niðurstöður leiðréttingarinnar liggja fyrir.
Umsóknir hafa borist frá yfir hundrað löndum, þar á meðal Vatíkaninu.
Hægt er að sækja um bæði höfuðstólslækkun og ráðstöfun á séreignarsparnaði inn á veðlán á heimasíðunni leidretting.is. Einstaklingum verður heimilt að ráðstafa séreignarsparnaði sínum inn á veðlán sem tekin voru vegna íbúðahúsnæðis til eigin nota. Skilyrði er að lánin séu tryggð með veði í íbúðarhúsnæði og að þau séu jafnframt grundvöllur til útreiknings vaxtarbóta.
Í báðum tilfellum er um að ræða tímabundin, skattfrjáls úrræði til þriggja ára þegar um er að ræða greiðslu iðgjalda inn á lán, en í fimm ár í tilviki húsnæðissparnaðar.