Fjórir sjúklingar þurftu að liggja á gangi hjartadeildar Landspítalans í lok síðustu viku og nokkrir á öðrum deildum spítalans.
Mikið annríki hefur verið á hjartadeildinni sem tekur 32 sjúklinga en 42 lágu þar inni í síðustu viku og um helgina. „Síðasta árið hafa alltaf annað slagið legið einn eða tveir sjúklingar úti á gangi en aldrei svona margir eins og í síðustu viku,“ segir Gestur Þorgeirsson, yfirlæknir hjartalækninga.
Á bráðadeild hefur einnig verið mikið álag og þar var gripið til þess ráðs í sumar að fá lækna frá útlöndum í afleysingar, m.a. frá Nýja-Sjálandi, að því er fram kemur í Morgunblaðinu í dag.
Óvenjumikið álag hefur verið á vökudeild Landspítalans alveg síðan í vor og sér ekki fyrir endann á því þó það virðist aðeins vera að skána, að sögn Jóns Hilmars Friðrikssonar, framkvæmdastjóra kvenna- og barnasviðs.