Landsvirkjun fylgist náið með framvindu mála vegna jarðhræringanna við Bárðarbungu, samkvæmt upplýsingum frá Magnúsi Þór Gylfasyni, yfirmanni samskiptasviðs Landsvirkjunar.
Viðbragðsáætlanir Landsvirkjunar hafa verið yfirfarnar og vöktun aukin og er það í samræmi við ákvörðun Ríkislögreglustjóra sem hefur lýst yfir óvissustigi almannavarna vegna jarðhræringanna.
Gos undir Vatnajökli getur leitt til flóða í ám sem renna frá honum. Í tilfelli eldgoss í Bárðarbungu er talið líklegast að flóð frá slíku gosi berist til norðausturs til Jökulsár á Fjöllum. Ólíklegra er talið að slíkt flóð berist að vatnasviðum aflstöðva Landsvirkjunar. Ef gos yrði við Hamarinn eða undir Köldukvíslarjökli mundi það berast um ána Sveðju eða Köldukvísl inn í Hágöngumiðlun.