Nýir framkvæmdastjórar á Landspítala

Gengið hefur verið frá ráðningu sjö framkvæmdastjóra klínískra sviða á Landspítala. Alls bárust 25 umsóknir frá 19 einstaklingum en einn umsækjandi dró umsókn sína til baka á lokastigum málsins.

Páll Matthíasson, forstjóri LSH, greinir frá þessu á heimasíðu spítalans. 

Páll segir, að hlutverk nýrrar framkvæmdastjórnar sé að leiða uppbyggingu næstu ára á Landspítala. „Það ríður því á að í framkvæmdastjórn veljist hópur með fjölbreytta og víðtæka reynslu sem deilir áherslum og framtíðarsýn fyrir Landspítala, þjóðarsjúkrahúsið. Mér þykir hafa tekist vel til,“ segir Páll í tilkynningu á vef LSH.

Nýju framkvæmdastjórarnir eru:

1. Guðlaug Rakel Guðjónsdóttir, framkvæmdastjóri flæðissviðs (bráða-, öldrun, endurhæfing)
2. Hlíf Steingrímsdóttir, framkvæmdastjóri lyflækningasviðs
3. Lilja Stefánsdóttir, framkvæmdastjóri skurðlækningasviðs
4. Jón Hilmar Friðriksson, framkvæmdastjóri kvenna- og barnasviðs
5. María Einisdóttir, framkvæmdastjóri geðsviðs
6. Alma D. Möller, framkvæmdastjóri aðgerðasviðs
7. Óskar Reykdalsson, framkvæmdastjóri rannsóknarsviðs

Páll segir að þau muni taka sæti í nýrri framkvæmdastjórn sem hefur störf 1. september. Auk hans sitja þar áfram aðstoðarforstjóri, framkvæmdastjórar lækninga, hjúkrunar, fjármálasviðs og rekstrarsviðs auk starfsmannastjóra. 

Samhliða tekur gildi nýtt skipurit Landspítala. 

Nánar á vef LSH.

• Blogga um frétt