„Þessi niðurstaða á rekstri borgarsjóðs kallar á uppstokkun og nýja hugsun í rekstri borgarinnar,“ segir Halldór Halldórsson, oddviti Sjálfstæðisflokksins í Reykjavík, um árshlutareikning Reykjavíkurborgar sem samþykktur var á fundi borgarráðs í dag.
Eins og greint var frá á mbl.is fyrr í dag var rekstrarniðurstaða samstæðu Reykjavíkurborgar, A- og B-hluta, jákvæð um 3.723 mkr en áætlun gerði ráð fyrir jákvæðri niðurstöðu um 2.203 mkr. Rekstrarniðurstaðan er því 1.520 mkr betri en gert var ráð fyrir.
Hins vegar versnaði rekstur borgarsjóðs milli ára og er 600 milljónum kr. lakari en áætlanir gerðu ráð fyrir. „Tap á borgarsjóði eru rúmir 2,3 milljarðar kr. en var 1,9 milljarðar kr. árið á undan. Rekstrarniðurstaða samstæðunnar er einnig verri þegar tekið hefur verið tillit til hækkunar á eignum Félagsbústaða sem er reiknuð tala upp á 2,4 milljarða kr.,“ segir í tilkynningu frá borgarfulltrúum Sjálfstæðisflokksins.
Þar segir einnig að Halldór Halldórsson og Júlíus Vífill Ingvarsson, borgarráðsfulltrúar Sjálfstæðisflokksins, telji að rekstrarniðurstaðan sé óviðunandi þrátt fyrir hækkun útsvarstekna um tæpan 1 milljarð kr.