Mikill erill hefur verið hjá Slökkviliði höfuðborgarsvæðisins (SHS) vegna vatnsleka en liðsmenn þess hafa sinnt 37 útköllum vegna leka á höfuðborgarsvæðinu frá klukkan sex í morgun. Um þriðjungur útkallanna hefur verið í Túnunum í Reykjavík.
Að sögn varðstjóra hjá SHS hefur verið mikill erill frá klukkan 06:00 til um 17:30 í dag. Samhliða útköllum vegna leka hafa liðsmenn SHS sinnt á þriðja tug sjúkraflutninga.
Hann segir að flest verkefnin, um það bil eitt af hverjum þremur, hafi verið í Túnunum í Reykjavík. Varstjóri segist ekki hafa nákvæma skýringu á því hvers vegna flest lekamálin hafi komið upp þar, en þar voru allar frárennslislagnir fullar þegar slökkviliðsmenn sinntu verkefnum þar.
Einnig var farið í verkefni í Kópavogi, Árbæ, Breiðholti og Vesturbæ.
Ljóst er að talsvert tjón hefur orðið í húsum vegna vatnsflaumsins.