Vilborg Arna Gissurardóttir, fjallagarpur, er nú komin til Katmandu í Nepal á leið sinni til Tíbet. Þar hyggst hún klífa fjallið Cho Oyu ásamt félaga sínum, Atla Pálssyni, reyndum leiðsögumanni og göngugarpi.
Félagarnir stefna að því að klífa fjallið, sem er sjötta hæsta fjall veraldar, án súrefnis og aðstoðarmanna.
Vilborg Arna sagði nýlega í samtali við mbl.is að þetta hafi lengi blundað í henni. „Það er kannski af því að það er mesta áskorunin af öllu að gera þetta svona,“ segir hún og bætir við að hún eigi margar fyrirmyndir sem hafi tekist á við áskorun af þessu tagi. Vilborg Arna segist einnig hafa haft þörf á að halda áfram eftir Everest, klífa hátt fjall og ljúka í þetta skipti leiðangrinum.
Vilborg Arna deildi fyrr í dag þessari mynd á Instagram-aðgangi sínum en þar segir hún að þau Atli sitji á uppáhalds kaffihúsinu og leggi línurnar fyrir leiðangurinn.