Aðeins einn vildi kaupa mjólkurkvóta á tilboðsmarkaði Matvælastofnunar í gær. Verðið lækkaði um 80 krónur og er nú orðið nærri helmingi lægra en það var þegar það var hæst.
Mikil umframeftirspurn var eftir kvóta frá ársbyrjun 2011 og fram á síðasta ár. Þeir kúabændur sem vildu auka framleiðsluna fengu ekki keyptan kvóta nema bjóða hátt. Verðið var komið í 320 krónur á síðasta ári. Á þessu ári hefur orðið alger viðsnúningur því verðið lækkaði um 60 krónur í apríl og um 80 krónur til viðbótar nú. Í báðum tilvikum í litlum viðskiptum.
Baldur Helgi Benjamínsson, framkvæmdastjóri Landssambands, segir í Morgunblaðinu í dag að ástæðan fyrir þróun kvótaverðsins sé sú að eftirspurnin sé nánast horfin. Bændur þurfi ekki að kaupa kvóta til að framleiða. Þeir fái fullt afurðastöðvaverð fyrir alla mjólk.