Héraðsdómur Reykjavíkur féllst ekki á kröfu verjenda lögreglumanns í LÖKE-málinu svokallaða um frávísun við fyrirtöku málsins í morgun. Næsta fyrirtaka fer fram 21. nóvember þar sem tekin verður fyrir krafa verjanda um lokað þinghald.
Lögreglumaðurinn er ákærður fyrir tvö brot í opinberu starfi. Hann neitaði sök þegar mál gegn honum var þingfest í Héraðsdómi Reykjavíkur í ágúst.
Fyrri ákæruliður tengist meintum óeðlilegum flettingum í málaskrárkerfi lögreglunnar, LÖKE, á tímabilinu 7. október 2007 til 16. nóvember 2013. Maðurinn er sakaður um að hafa misnotað stöðu sína sem lögreglumaður þegar hann fletti upp nöfnum 41 konu í kerfinu og skoðaði upplýsingar um þær, án þess að flettingarnar tengdust starfi hans í lögreglunni.
Í síðari ákærulið er hann sakaður um að hafa þann 20. ágúst 2012 sent tölvuskeyti á samskiptasíðunni Facebook um afskipti sín af ungum manni í starfi sínu sem lögreglumaður, sem átti að fara leynt.
Annars vegar er maðurinn ákærður fyrir brot á 139. gr. almennra hegningarlaga nr. 19/1940 og hins vegar brot á 1. mgr. 136. gr. almennra hegningarlaga nr. 19/1940.