Endurupptökunefnd hefur sent endurupptökubeiðni Erlu Bolladóttur og Guðjóns Skarphéðinssonar í Guðmundar- og Geirfinnsmálunum til ríkissaksóknara til umsagnar. Ríkissaksóknari hefur frest til 22. september til að taka afstöðu í málinu.

Endurupptökubeiðnin var send til ríkissaksóknara 4. september sl. að sögn Ragnars Aðalsteinssonar, lögmanns Erlu og Guðjóns. Hann bætir við að þetta sé afar naumur tími til að fara yfir gögnin, sem telja tugi þúsunda blaðsíðna.

Ragnar segir ennfremur, að það sé nú í höndum ríkissaksóknara að mæla með endurupptöku eða leggjast gegn henni. Hann tekur fram að þriðji möguleikinn sé fyrir hendi, þ.e. að embættið taki ekki afstöðu til beiðninnar. Sú niðurstaða er hins vegar harla ólíkleg að mati Ragnars.

„Ég á erfitt með að sjá fyrir mér að ríkissaksóknari leggist gegn endurupptökunni, með hliðsjón af hinum nýju gögnum sem fram eru komin. Þá á ég ekki síst við mat sálfræðinganna,“ segir Ragnar í samtali við mbl.is.

Með ummælum sínum vísar Ragnar til skýrslna Gísla H. Guðjóns­son­ar, pró­fess­ors í rétt­ar­sál­fræði, og Jóns Friðriks Sig­urðsson­ar, yf­ir­sál­fræðings á Land­spít­al­an­um], um falsk­ar játn­ing­ar.

End­urupp­töku­beiðnin var lögð inn til endurupptökunefnd­ar­ þann 26. júní sl. Erla og Guðjón, sem hlutu dóma í Guðmundar- og Geirfinnsmálunum, fara fram á end­urupp­tökuna til að sýna fram á sak­leysi þeirra.

Tengdar fréttir

Guðmundar- og Geirfinnsmál

Nýju ljósi varpað á Guðmundar- og Geirfinnsmál

• Ríkið þarf að greiða Alberti 26 milljónir
• „Þetta er auðvitað algjörlega galið“
• Skilur eftir sár sem munu aldrei gróa
• Hagsmunir ríkisins að ljúka máli Erlu

» Fleiri tengdar fréttir

• Blogga um frétt