Páll Winkel, forstjóri Fangelsismálastofnunar, segir að framkvæmdir við nýja fangelsið á Hólmsheiði í Reykjavík séu allar á áætlun og gert sé ráð fyrir að hægt verði að taka við fyrstu föngunum um áramótin 2015-2016.
„Það er ráðgert að fangelsið verði fullbúið og tilbúið í árslok 2015, þannig að um önnur áramót getum við tekið við fyrstu föngunum,“ sagði Páll í samtali við Morgunblaðið í gær.
Hann segir að þá verði næsta verkefni að loka Hegningarhúsinu við Skólavörðustíg og kvennafangelsinu við Kópavogsbraut í Kópavogi.