„Við höfum aldrei séð landið svona blómlegt, allan úthaga og afrétti. Það er ótrúlegt að ríða um landið og sjá allan þennan gróður. Samt er í Grýtubakkahreppi töluvert margt fé.“
Þetta segir Þórarinn Ingi Pétursson, bóndi á Grýtubakka og formaður Landssamtaka sauðfjárbænda, í samtali í Morgunblaðinu í dag.
Þórarinn er nýkominn úr fyrstu göngum á afréttarlöndum í Grýtubakkahreppi. Mikill snjór var á afréttinum í vor og fram eftir sumri. Féð var því rekið seinna en vanalega og þurfti að reka það lengi í snjó til að koma því í gróður norðan við hann. Þórarinn segir að snjór sé enn að fara og landið enn að gróa en vissulega séu grös fallin í þeim högum sem fyrstir komu til í vor.