Tuttugu farsímum stolið

Hátt í tuttugu farsímum var stolið af gestum skemmtistaða í miðborginni um síðustu helgi. Þetta kemur fram í tilkynningu frá lögreglu og vill hún ítreka þau varnaðarorð sín til gesta á skemmtistöðum að vera alveg sérstaklega á varðbergi hvað þetta snertir.

Fólk er jafnframt hvatt til hafa handtöskur lokaðar og geyma ekki síma sína á borðum eða glámbekk þar sem óprúttnir aðilar geta nálgast þá. Lögreglan hvetur einnig veitingamenn til að halda vöku sinni, gera viðeigandi ráðstafanir ef grunur vaknar um óvandaða aðila á ferð og stuðla þannig að fækkun þessara þjófnaða.

Samkvæmt tilkynningunni voru það allt konur, sem urðu fyrir barðinu á farsímaþjófum síðustu helgi, en hvort um tilviljun var að ræða skal ósagt látið.

Farsímaþjófnuðum hefur annars fækkað í miðborg Reykjavíkur á þessu ári í samanburði við sama tímabil árið 2013. Á síðasta ári hafði farsímaþjófnuðum hins vegar fjölgað mjög mikið í miðborginni frá árinu 2010, eða úr 88 í 384 árið 2013. 

Það sem af er árinu 2014 hafa lögreglu borist rúmlega 200 tilkynningar um farsímaþjófnaði í miðborginni. Áfram stefnir því í fækkun þessara brota á milli ára, en farsímaþjófnaðir síðustu helgar sýna hins vegar að fólk verður stöðugt að halda vöku sinni. 

Lögreglan bendir einnig á að margir þeir sem ræna símum í miðborginni reyna svo að selja þá á netinu. Því ættu  kaupendur varnings á þeim vettvangi að hafa varan á.

„Þótt mörgum finnist erfitt að ganga úr skugga um að hlutur sé ekki illa fengin er samt ýmislegt hægt að gera. Biðja má um kvittun frá upphaflegum kaupum, t.d. með þeim formerkjum að kanna hvort hluturinn sé í ábyrgð. Ef keypt eru notuð raftæki skal athugað hvort réttir fylgihlutir séu sannarlega til staðar, þ.e. snúrur, leiðbeiningarbæklingar, hleðslutæki o.s.frv,“ segir m.a. í yfirlýsingunni.

• Blogga um frétt