Enn bætist í hóp íslenskra karlmanna sem taka þátt í HeForShe herferðinni en þegar þetta er skrifað eru þeir orðnir 7.062 talsins. Eins og mbl.is fjallaði um á miðvikudaginn hafa flestir íslenskir karlmenn tekið þátt miðað við höfðatölu.
Síðdegis á miðvikudag voru íslensku karlmennirnir á listanum 3.744 talsins þannig að aukningin síðan er gífurleg. Voru mennirnir þó aðeins 997 fyrr sama dag, en þá voru íslenskir karlmenn flestir á listanum, miðað við höfðatölu.
Nú hafa íslenskir karlmenn farið fram úr stórþjóðum eins og Brasilíu, Mexíkó, Indlandi og Svíþjóð í skráningum. Reyndar hafa fleiri íslenskir karlmenn skráð sig á Íslandi heldur en á öllum hinum Norðurlöndunum.
Aðeins munar um 595 nöfn til þess að íslenskir karlmenn á listanum séu jafnmargir og þeir áströlsku. Ef skráning Íslendinga heldur áfram að ganga eins hratt og síðustu daga er hægt að áætla að Íslendingar á listanum verði fleiri en Ástralar.
HeForShe er herferð Sameinuðu þjóðanna sem gengur út á að virkja karlmenn í mótmælum gegn kynjamisrétti.
Alls hafa 145.513 karlmenn tekið þátt í herferðinni.
Sjá fyrri fréttir mbl.is:
„Fleiri skráðir á Íslandi en í Svíþjóð“
„Íslenskir karlmenn skara fram úr“