Umhverfisstofnun hefur veitt Háskóla Íslands heimild til þess að flytja til landsins og rannsaka erfðabreyttar mýs. Mýsnar eru með mismunandi erfðabreytingum og eiga að koma að gagni við rannsóknir á krabbameinssjúkdómum og við kennslu.
Það er lífefna- og sameindalíffræði læknadeildar HÍ sem mun rannsaka mýsnar í dýraaðstöðu háskólans undir eftirliti dýralækna við tilraunastöð hans í meinafræði, að því er kemur fram í leyfinu frá Umhverfisstofnun
Í Morgunblaðinu í dag segir, að mýsnar verði notaðar til þess að rannsaka áhrif erfðabreytinga á sortuæxli. Það verður gert með því að láta mismunandi breyttar mýs æxlast og með vefjatöku, að því er kemur fram í umsókninni um leyfið Mýsnar eru frá viðurkenndri tilraunastofu í Frakklandi.