„Nú er maður farinn að skilja af hverju maður skilur ekkert í þessu,“ sagði Reimar Pétursson, verjandi Sindra Sveinssonar, undir hádegi á öðrum degi aðalmeðferðar í máli sérstaks saksóknara gegn fyrrverandi bankastjóra og þremur starfsmönnum Landsbankans. Framsetning gagna þykir verjendum sérstök.
Eins og fram hefur komið ákærði sérstakur saksóknari Sigurjón Árnason, fyrrverandi bankastjóra Landsbankans, Ívar Guðjónsson, fyrrverandi forstöðumann eigin fjárfestinga sama banka, og tvo starfsmenn eigin fjárfestinga, þá Júlíus S. Heiðarsson og Sindra Sveinsson.
Allir eru þeir ákærðir fyrir markaðsmisnotkun á tímabilinu 1. nóvember 2007 til 3. október 2008 og eru þeir sakaðir um að hafa handstýrt verðmyndun hlutabréfa í Landsbankanum og með því blekkt fjárfesta, kröfuhafa, stjórnvöld og samfélagið í heild.
Á öðrum degi aðalmeðferðarinnar hélt skýrslutaka yfir Júlíusi áfram og var sem fyrr notast við kauphallarhermi sérstaks saksóknara. Hermirinn gerir saksóknara kleift að skoða hvern viðskiptadag fyrir sig hjá Landsbankanum á umræddu tímabili og er hann byggður á yfirliti frá kauphöllinni yfir viðskipti með og tilboð í hlutabréf í Landsbankanum á tilteknu tímabili.
Hins vegar hafa verjendur ítrekað kvartað yfir því að þeir skilji illa framsetningu gagna með herminum. Undir hádegi í dag, eftir að saksóknari hafði farið yfir hvern viðskiptadag frá mars 2008 til júlí 2008, kröfðust verjendur skýringa á tilteknum táknum í herminum sem þeir sögðust ekki hafa tekið eftir áður. Sigurður G. Guðjónsson, verjandi Sigurjóns, spurði þá hvort ekki þyrfti að fara yfir heila klabbið á nýjan leik, frá 1. nóvember, og uppskar hlátur dómara og verjenda.
Tilvitnuð ummæli Reimars í upphafi greinarinnar komu þá í kjölfarið og Júlíus, sem svarað hefur spurningum um ýmis atriði sem birtast í herminum undanfarna tvo daga sagði þá: „Ég er eiginlega furðu lostinn eftir að hafa áttað mig á þessu.“
Dómarar ákváðu að hádegishlé væri góð hugmynd á þessum tímapunkti og munu aðilar málsins því væntanlega nota það til að glöggva sig á nýjustu vendingum í málinu. Það ætti að skýrast eftir hádegið hvort saksóknari þurfi að endurtaka þær spurningar sem grundvallast hafa á kauphallarherminum og hvort vinnan í morgun og eftir hádegi í gær sé fyrir bí.