Markmiðið að fækka slysum

Árlegir öryggisdagar Strætó og Vís voru settir í dag og munu þeir standa yfir í fimm vikur. Áhersla er lögð á öryggi farþega Strætó ásamt almennu öryggi. Markmiðið er að fækka slysum og árekstrum um 30% á milli ára og koma í veg fyrir slys á farþegum.

Fram kemur í tilkynningu, að átakið hafi hafist í síðustu viku innanhúss hjá Strætó meðal annars með því að fara vel yfir öryggismál. Starfsmenn taka einnig þátt í því að semja þau skilaboð sem Strætó sendir frá sér í átakinu.

„Öryggisdagar er samstarfsverkefni Strætó og VÍS og er ætlun þeirra að auka forvarnir í umferðinni. Með verkefninu vilja Strætó og VÍS leggja sitt af mörkum við að fækka slysum og tjónum, efla öryggi farþega og starfsmanna Strætó og almennt öryggi á götum borgarinnar,“ segir í tilkynningu. 

• Blogga um frétt