Rjúpnaskytturnar Ingvar Helgason og Hafþór Óskar Gestsson komu heim með óvæntan feng þegar þeir fóru til veiða á Skógarströnd við Breiðafjörð í gær. Þar gengu þeir fram á ungan haförn sem lá óvígur á jörðinni.
„Við sjáum fullvaxinn örn fljúga og við fylgjumst með. Þá sjáum við einhverja hreyfingu úti á mel. Þaðan flýgur fuglinn 2-3 metra upp, hálfhallar og fellur aftur. Hann gerir þetta í þrí- eða fjórgang þar til hann endar inni í kjarrhríslu hjálparvana,“ segir Ingvar en að líkindum er fuglinn ungi hafarnarins sem þeir sáu á flugi.
Þeir höfðu samband við Náttúrufræðistofnun sem réð þeim að fara með fuglinn í Húsdýragarðinn í Reykjavík til aðhlynningar. Útbjuggu þeir þá kassa undir örninn til að flytja hann í, að því er fram kemur í Morgunblaðinu í dag.