Innlent | mbl | 11.11.2014 | 14:58

„Gefur þeim tekjuhæstu heila Hörpu“

Helgi Hjörvar, þingmaður Samfylkingarinnar. mbl.is/Ómar Óskarsson

„Á meðan eldarnir loga í velferðarkerfinu leikur forsætisráðherra sér í Hörpu. Með skuldaleiðréttingunni gefur hann svo þeim tekjuhæstu í landinu heila Hörpu að gjöf.“ Þetta sagði Helgi Hjörvar, þingmaður Samfylkingarinnar, á Alþingi í dag.

Helgi beindi spurningu að Sigmundi Davíð Gunnlaugssyni, forsætisráðherra, í óundirbúnum fyrirspurnartíma á þinginu, þar sem hann spurði hvort skuldaleiðréttingin sem var birt í gær væri raunveruleg leiðrétting á forsendubrestinum sem heimili urðu fyrir í hruninu.

Sigmundur sagði Helga „halda áfram með sömu vitleysisumræðuna,“ og taldi hann vera einn af fáum sem liti svo neikvæðum augum á leiðréttinguna. Hann benti á það að meira en 20 milljarðar, eða helmingurinn af því fjármagni sem notað var í 110% leið fyrrverandi ríkisstjórnarinnar, hefði farið til 1% heimila í landinu.

Skuldaleiðréttingin nái hins vegar til mun breiðari hóps, en 75% fjármagnsins rennur til einstaklinga undir 7 milljónum í árstekjur. 25% rennur til þeirra sem eru rétt ofan við 7 milljónir, og sagði Sigmundur sárafátt hátekjufólk njóta leiðréttingarinnar.

Heildarfjárhæð aðgerðanna nemur 150 milljörðum króna og nær til ríflega 120 þúsund umsækjenda. Mánaðarleg greiðslubyrði getur lækkað um ríflega 15 prósent nýti heimili sér úrræði leiðréttingarinnar til fulls.

Helgi benti á það að greiðslubyrði lækki um 7-9 þúsund á mánuði hjá helmingi heimila, og sagðist telja að verðbólga muni í kjölfarið hækka og vaxtabæturnar minnka. Sigmundur vísaði þessu á bug og sagði að ef svo óheppilega vildi til að verðbólgan færi aftur á skrið væri þeim mun mikilvægara að hafa ráðist í leiðréttinguna því á ætti hún eftir að koma sér vel.

„Aðgerðir ríkisstjórnarinnar hafa aukið kaupmátt íslenskra heimila meira en nokkurs staðar í Evrópu og aðgerðir í skattakjörum munu auka þau enn frekar.“