Hæstiréttur hefur staðfest úrskurð Héraðsdóms Reykjaness þar sem fallist var á kröfu ákæruvaldsins um að Julien Assange, stofnandi Wikileaks, gefi skýrslu fyrir dómi í gegnum síma í fjársvikamáli gegn Sigurði Inga Þórðarsyni, sem er betur þekktur sem Siggi Hakkari.

Málið gegn Sigurði var þingfest í júní sl. vegna fjársvika, þjófnaða, eignarspjalla og skjalafals. Stærsti ákæruliðurinn varðar 6,7 milljóna króna fjársvik en í ákæru segir að Sigurður hafi blekkt eiganda vefverslunar til að millifæra fjármunina inn á reikning sinn í stað þess að leggja hann inn á reikning Wikileaks. Um var að ræða ágóða af sölu varnings til stuðnings uppljóstrarasíðunni.

Samkvæmt ákærunni sagði Sigurður eiganda vefverslunarinnar að hann starfaði í umboði Assange og hefði því heimild hans til að fara fram á að peningurinn yrði lagður inn á umræddan reikning. Sigurður Ingi er ákærður fyrir að hafa nýtt sér féð í eigin þágu.

Assange hefur hafst við í sendiráði Ekvadors í London í um tvö ár. Ákæruvaldið fór fram á að hann fengi að bera vitni í gegnum síma en Vilhjálmur H. Vilhjálmsson, verjandi Sigurðar Inga, sagði óhjákvæmilegt að Assange kæmi fyrir dóminn til að bera vitni.

Tengdar fréttir

Sigurður Ingi Þórðarson (Siggi hakkari)

„Sigurður beitti son okkar hrottalegu ofbeldi“

• Sigurður áfram í síbrotagæslu
• Dæmdur í þriggja ára fangelsi
• Sigurður játar kynferðisbrot
• Siggi hakkari tók sér frest

» Fleiri tengdar fréttir

• Blogga um frétt