„Það var alveg með ólíkindum að engan sakaði,“ segir Geir Gunnarsson, forstjóri Bernhards en mikið tjón varð þegar að 18 hjóla trukkur með stórum tengivagni rann stjórnlaust frá Holtagörðum að verkstæði Bernhards við Vatnagarða á þriðja tímanum í dag.
Að sögn Geirs rakst flutningabíllinn á þrjá bíla á bílastæði Bernhards og endaði á húsi fyrirtækisins. „Tjónið er töluvert. Hann heflaði klæðninguna á húsinu aðeins að utan og skemmdi hurðarstafi. Við skiljum ekki hvernig hann hitti á milli sumra bíla hjá okkur án þess að skaða þá en hann rakst á þrjá bíla. Því miður var einn bíll sem átti að vera afhentur í eftirmiðdaginn fyrir honum, en trukkurinn straujaði vinstri framhliðina á honum.“
Talið er að ökumaður flutningabílsins hafi gleymt að setja bílinn í handbremsu þegar hann staðnæmdist og yfirgaf bifreiðina.
„Þetta er 50 tonna flykki sem sigldi frá Holtagörðum, keyrði eftir gangstéttinni, braut niður nokkur tré og fór svo yfir gangamótin þar sem hann lenti aftan á öðrum bíl og ýtti honum yfir gatnamótin. Svo fór hann inn á planið hjá Vatnagörðum 28 og svo hjá okkur á 26,“ segir Geir.
Málið er nú í höndum tryggingafélaga sem vinna að því að meta tjónið. Geir telur að tjónið hlaupi á milljónum. „Það er þó blessun að tjónið hafi ekki orðið meira og ótrúlegt að það var ekki skráma á neinum einasta manni.“