Íbúar við Súðarvog í Reykjavík hafa kvartað undan efnamengun frá nýju sprautunarverkstæði í hverfinu en borgaryfirvöld hafa ekkert gert í málinu.
Ármann Reynisson rithöfundur býr í hverfinu. Hann segir mengunina rýra verðmæti íbúða. Ingrid Jónsdóttir leikkona býr í sömu götu. Hún segir mengunina bætast við annað nýtilkomið ónæði.
„Það gerði svo illt verra þegar borgaryfirvöld leyfðu í ársbyrjun sprautunarverkstæði að hefja starfsemi á jarðhæð í næsta húsi. Ef hér á að vera blönduð byggð er sú ákvörðun auðvitað forkastanleg. Það koma eiturgufur inn í íbúðina mína og reglulega kemur upp lakklykt úr niðurföllum hjá mér. Ef eldfim efni eru sett út í niðurfallið hlýtur það að vera stórhættulegt,“ segir Ingrid í umfjöllun um mál íbúa við Súðarvog í Morgunblaðinu í dag.