Nánast eldsneytislaus við lendingu

Betur fór en á horfðist í gærkvöldi er Cessna-flugvél var snúið við á leið sinni frá Grænlandi til Íslands en óttast var að eldsneyti vélarinnar dygði ekki. Mikill viðbúnaður var hér á landi en vélin lenti heilu og höldnu í Kulusuk. Þá var einungis eftir eldsneyti fyrir fimm mínútna flug til viðbótar.

Samkvæmt upplýsingum frá Landhelgisgæslunni voru tveir um borð í flugvélinni sem er sex manna tveggja hreyfla af Cessna-gerð. Flugmennirnir tilkynntu vandræði sín klukkan 18:15 en mikill mótvindur var á leiðinni og því gekk hraðar á eldneytisbirgðir vélarinnar en venjan er. 

Þyrla Landhelgisgæslunnar fór strax í loftið og eins var viðbúnaður á Keflavíkurflugvelli. Það var síðan klukkan 18:28 sem ákveðið var að snúa vélinni aftur til Grænlands og lenti hún heilu og höldnu í Kulusuk klukkan 19:35 og að sögn varðstjóra hjá Landhelgisgæslunni mátti ekki tæpara standa því einungis var eftir eldsneyti fyrir fimm mínútna flug til viðbótar.

Mynd af mælaborði Cessna flugvélar Af vef Cessna

• 1 blogg um fréttina

Bloggað um fréttina

• Njörður Helgason: Eldsneytis bjargarleið.