Skattaumhverfi á Íslandi leiðir til þess að sjávarútvegsfyrirtæki geta ekki staðið straum af kostnaði við nýsköpun, sem er forsenda aukinnar verðmætasköpunar, að sögn Elliða Vignissonar, bæjarstjóra í Vestmannaeyjum.
Hann segir í Morgunblaðinu í dag, að þessu megi breyta með því að veita skattalega hvata til nýsköpunarverkefna í stað þess að ríkið hækki skatta og skili þeim til baka í formi styrkja til veikra byggða.
Hagræðingarkrafa í sjávarútvegi hafi leitt til fækkunar starfa í sjávarútvegi og umhugsunarvert sé að sú skuli vera raunin í bæjarfélagi eins og Vestmannaeyjum, sem hafi 13% aflaheimilda á sama tíma og einungis 1,2% þjóðarinnar búi þar.