Íslenska upplýsingatæknifyrirtækið Sensa hefur í tvö ár unnið að verkefni fyrir danska raftækjarisann Bang & Olufsen. Sensa hefur smíðað stýrieiningu sem „talar við“ öll tæki í versluninni og tengir við netið.
Viðskiptavinir geta svo, t.d. í gegnum nettengdan snjallsíma, stjórnað sjónvörpunum og hljómflutningstækjunum þegar þeir skoða sig um í búðinni.
Búnaðurinn er skalanlegur fyrir verslanir af ólíkum stærðum og er þegar í notkun í fjölda verslana allt frá Bandaríkjunum til Kína, að því er fram kemur í umfjöllun um starfsemi Sensa í Morgunblaðinu í dag.