Félag prófessora við ríkisháskóla og samninganefnd ríkisins munu funda í dag klukkan þrjú. Fundinum hefur verið frestað í tvígang, á föstudag og í gær, en Rúnar Vilhjálmsson, formaður FPR segist vongóður um að hann skili einhverjum árangri.
„Ég trúi því að hægt sé að taka markviss skref fram á við á þessum fundi svo hægt sé að ganga frá samningum áður en kemur til verkfalls,“ segir Rúnar. „Við munum reyna að sitja þennan fund þar til eitthvað kemur út úr honum.“
Ef ekki nást samningar hefst verkfall prófessora við Háskóla Íslands 1. desember og stendur til 15. desember.