Rannsókn lögreglunnar á Akureyri á meintri líkamsárás á Hvammstanga í júní er lokið. Er nú málið komið til ríkissaksóknara.
Þetta staðfestir Gunnar Jóhannesson, yfirmaður rannsóknardeildar lögreglunnar á Akureyri í samtali við mbl.is.
Í samtali við mbl.is í október sagði Gunnar að réttarmeinafræðileg rannsókn hafi ekki leitt neitt nýtt í ljós í málinu, en komið hefur fram að maðurinn sem lést hafi hlotið þungt höfuðhögg með þeim afleiðingum að höfuðkúpan brotnaði og blæddi inn á heilann.
Maðurinn lést þremur dögum eftir meinta líkamsárás.
Upprunalega voru fjórir menn settir í gæsluvarðhald vegna málsins en var tveimur þeirra sleppt stuttu síðar. Tveir menn, feðgar sem bjuggu í húsinu þar sem maðurinn fannst sættu farbanni þar til í lok september. Ekki var farið fram á áframhaldandi farbann og séu þeir frjálsir ferða sína. Því er enginn í varðhaldi vegna málsins.
Feðgar á Hvammstanga lausir úr farbanni