„Þessi nóvembermánuður verður með hlýjustu nóvembermánuðum sem við vitum um. Trúlega sá næsthlýjasti í Reykjavík og á suðvesturhorninu en Norðurland er eitthvað neðar á listanum. Úti við ströndina á Norðurlandi, við Grímsey og annars staðar, var líka mjög hlýtt og trúlega er þetta einn hlýjasti nóvember frá upphafi mælinga þar.“
Þetta segir Trausti Jónsson veðurfræðingur í Morgunblaðinu í dag, en þó að enn sé einn dagur eftir af nóvember getur Trausti slegið þessu föstu. Hann segir að það hafi nokkrir kaldir dagar komið á Norðurlandi sem slái hitann niður.
Meðalhiti ársins, sem Trausti tók saman í síðustu viku, var 6,67 gráður í Reykjavík og hefur aðeins einu sinni verið hærri. Meðalhiti nóvember síðustu tíu árin hefur verið um 2,2 gráður.