Hreinn Haraldsson vegamálastjóri, segir þau viðskipti sem Vegagerð ríkisins hefur átt við einstaklinga og fyrirtæki sem tengjast starfsmönnunum hennar fjölskylduböndum litin alvarlegum augum. Fjallað var um málið í Kastljósinu í gær þar sem Hreinn Haraldsson viðurkenndi að starfsmenn hafi ekki starfað samkvæmt reglum.
Í samtali við mbl.is segir Hreinn að hann hafi verið meðvitaður um fæst þeirra atriða sem til umfjöllunar voru í Kastljósinu áður en fyrirspurn frá þættinum barst. Kastljós hafði rannsakað þrjú dæmi um vafasöm viðskipti Vegagerðarinnar að undanförnu.
Eitt dæmið snýr að hundraða milljóna greiðslum til fyrirtækis sem tengist fyrrverandi starfsmanni. Annað dæmi snýr að viðskiptasamningi Vegagerðarinnar við fyrirtæki í eigu starfsmanns Vegagerðarinnar og eiginkonu hans. Í þriðja tilvikinu sé um að ræða viðskipti við fyrirtæki sem er í eigu bróður starfsmanns Vegagerðarinnar. Fram kom, að viðskiptin nemi hundruðum milljóna en fóru fram án útboðs.
„Ég var ekki meðvitaður um þessi ræstingamál og þessi viðskipti við einn verktaka umfram aðra voru heldur ekki á mínu borði. Varðandi hreingerninarnar þá er þegar búið að veita viðkomandi starfsmanni formlega áminningu,“ segir Hreinn en slík áminning getur verið undanfari brottvikningar þó sú sé ekki alltaf raunin. Að auki segir Hreinn að samningurinn við ræstingafyrirtækið hafi verið felldur úr gildi.
„Hvað varðar innkaup á vörum og þjónustu bæði hjá verktökum og byrgjum þá er búið að setja af stað vinnu við að fara yfir hvernig má bæta og breyta verkferlum svo það sé alveg tryggt að það séu engir hagsmunaárekstrar í gangi og að ákvarðanir séu gegnsæjar,“ heldur hann áfram.
Hreinn segir málið litið alvarlegum augum innan Vegagerðarinnar og að hann efist ekki um að álit almennings á Vegagerðinni muni hljóta hnekki vegna málsins.
„Ég er hræddur um að það því miður að þetta gefi neikvæða sýn á okkar verkefni og að það dragi jafnvel úr trausti á okkur. En ég get ekki litið framhjá því að þarna eru hlutir sem eru ekki í lagi og þarf að bæta og þangað til við höfum gert það er eðlilegt að fólk sé með einhverja varnagla. En þá er bara að vinna það upp aftur.“