Vegna óvenju mikils jarðsigs á Siglufjarðarvegi eru vegfarendur beðnir að gæta ýtrustu varúðar. Þetta kemur fram í tilkynningu frá Vegagerðinni.
Þá kemur fram, að búast meg við minniháttar töfum í Hvalfjarðargöngum í nótt frá kl. 00:30 og fram undir morgun vegna vinnu við vegbúnað.
Það er hálka og skafrenningur á Sandskeiði, Hellisheiði og í Þrengslum en hálkublettir eða hálka á Reykjanesbraut. Hálka er annars á flestum öðrum leiðum á Suðurlandi.
Holtavörðuheiði er lokuð en hægt er að fara hjáleið um Laxárdalsheiði og Bröttubrekku. Hálka er á flestum leiðum á Vesturlandi en ófært á Fróðárheiði og þungfært yfir Heydal. Þæfingsfærð og skafrenningur er á Svínadal.
Á Vestfjörðum snjóþekja á Steingrímsfjarðarheiði, Þröskuldum og Ísafjarðardjúpi og víða éljagangur eða snjókoma. Þæfingsfærð er milli Brjánslækjar og Kleifaheiðar en þar er hálka. Snjóþekja er á Klettshálsi, Mikladal og Hálfdán.
Lokað er á Þverárfjalli en snjóþekja og snjókoma á flestum leiðum í Húnavatnssýslu. Flughálka með stórhríð er frá Sauðárkróki að Hofsósi og í Hjaltadal. Ófært er frá Hofsósi að Siglufirði en þungfært í Blönduhlíð.
Nú er búið að opna Öxnadalsheiði en þar er þæfingsfærð og skafrenningur og áfram unnið að útmokstri. Hálka og skafrenningur er á Víkurskarði og á flestum vegum á Norðurlandi eystra en þæfingsfærð á Hólasandi.
Hálka er á Fagradal, Fjarðarheiði og Oddskarði og hálka eða snjóþekja á vel flestum vegum á Austur- og Suðausturlandi. Flughálka og skafrenningur er á milli Víkur í Mýrdal og Steina.