„Erlendir ferðamenn sem eru á landinu nú yfir jól og áramót eru sennilega um fjórðungi fleiri en var í fyrra. Þessu er einfaldlega svarað með efldri þjónustu. Á jóladag eiga 1.000 bókað sæti í ferðir með okkur, það eru um það bil 20 rútur.“
Þetta segir Þórarinn Þór, markaðsstjóri Kynnisferða, um aukin umsvif í ferðaþjónustunni um hátíðirnar í Morgunblaðinu í dag. Reykjavík er komin á kortið sem jólaborg á evrópska vísu og þar er markaðsstarf Höfuðborgarstofu sagt vera að skila sér.
Einnig hafa einkafyrirtæki verið öflug í þessu starfi og segir Þórarinn þetta í raun áhersluverkefni hjá Kynnisferðum. Þetta skilar sér, því Reykjavík er meðal annars á lista CNN-fréttastofunnar yfir áhugaverðustu vetrar- og jólaáfangastaði í heimi.