Stysta leiðin ekki endilega sú færa

Eitthvað hefur verið um að ferðamenn, sem aka um landið með aðstoð leiðsögutækja, hafi farið villur vega í ófærðinni að undanförnu, að sögn varðstjóra í lögreglunni á Egilsstöðum.

Meðal annars hefur þurft að aðstoða ferðamenn á Skriðdal, Öxi og Hellisheiði eystri en sú leið er sumarvegur og verður næst rudd í kringum 17. júní.

Svo virðist sem leiðsögutækin bendi á stystu leið milli áfangastaða en því miður ekki alltaf þá leið sem er fær að vetrarlagi, að sögn lögreglunnar.

Að öðru leyti hefur verið fremur rólegt hjá lögreglunni á Egilsstöðum í nótt og í morgun fyrir utan að það hefur þurft að aðstoða fólk við að komast leiðar sinnar vegna ófærðar.

Á Austurlandi er þæfingur á Vopnafjarðarheiði og í Jökuldal annars er snjóþekja, hálka og éljagangur á flestum vegum á Austurlandi. Ófært er á Vatnsskarði eystra.

• 1 blogg um fréttina

Bloggað um fréttina

• Ólafur Kristinn Guðmundsson: Hér þarf ekki að kenna leiðsögukerfunum um....