Enn hafa engir yfirmatsmenn verið dómkvaddir í máli Annþórs Kristjáns Karlssonar og Barkar Birgissonar sem gefið er að sök að hafa valdið dauða samfanga þeirra á Litla-Hrauni. Verjandi Annþórs segir hringinn að þrengjast um hverjir verði fengnir til að gefa mat og vonast til að fyrirtaka geti farið fram fljótlega.
Þeir Annþór og Börkur eru ákærðir fyrir að hafa 17. maí 2012 veist í sameiningu með ofbeldi að fanga á Litla-Hrauni og veitt honum högg á kvið með þeim afleiðingum að rof kom á milta og á bláæð frá miltanu sem leiddi til dauða hans skömmu síðar af völdum innvortis blæðinga.
Rúmt hálft ár er síðan Hæstiréttur átaldi drátt sem hefur orðið á dómskvaðningu yfirmatsmanna. Verjendur Annþórs og Barkar fóru upphaflega fram á að fá erlenda sérfræðinga til að fara yfir mat réttarmeinafræðings á krufningarskýrslu og skýrslu tveggja prófessora í sálfræði um atferli fanga á upptöku úr öryggismyndavélum. Hæstiréttur gerði síðan dómara í málinu að finna sjálfur matsmenn.
„Hringurinn er að þrengjast varðandi hvaða aðilar munu taka þetta að sér. Ég geri ráð fyrir að það verði boðað þinghald fljótlega til að ganga formlega frá dómkvaðningunni,“ segir Hólmgeir Elías Flosason, verjandi Annþórs í málinu.
Erfitt hafi reynst að finna hæfa aðila erlendis til að gefa mat í málinu. Það skýri þann drátt sem orðið hefur á því. Ekki sé þó búið að staðfesta neina matsmenn ennþá.
Fyrri frétt mbl.is: Enn engir yfirmatsmenn dómkvaddir