Veðurstofan varar við stormi, meira en 20 m/s, norðvestanlands þegar líður á kvöldið, en suðaustantil á morgun.
Næsta sólarhringinn er spáð vestlægri eða breytilegri átt, 5-10 m/s, og stöku éljum. Spáð er snjókomu með köflum norðan- og norðvestantil. Vaxandi norðaustan átt verður í kvöld, hvassviðri eða stormur um og upp úr miðnætti og snjókoma eða él, en úrkomulítið sunnanlands, hvassast norðvestantil. Sjá nánar á veðurvef mbl.is.
Á Suðvesturlandi og eru hálkublettir á stofnbrautum á höfuðborgarsvæðinu, á Reykjanesbraut og Suðurnesjum. Hálka er bæði á Hellisheiði og í Þrengslum en víða er snjóþekja á Suðurlandi.
Snjóþekja og hálka er all víða á Vesturlandi. Þæfingsfærð er á Holtavörðuheiði en unnið er að mokstri. Hálka er á Bröttubrekku en þar er flutningabíll útaf og tefur opnun og mun einnig tefja umferð fyrst um sinn.
Á Vestfjörðum er víða snjóþekja. Þæfingsfærð er á Kleifaheiði. Þungfært á Steingrímsfjarðarheiði og Þröskuldum en unnið er að mokstri.
Snjóþekja er á vegum á Norðurlandi, einkum á heiðum og útvegum. Þæfingsfærð er á Vatnsskarði og einnig frá Hofsósi að Fljótunum en unnið er að mokstri.
Á norðurlandi Eystra er víða hálka og snjóþekja. Ófært með stórhríð er á Hófaskarði og beðið er með mokstur þar. Hálka er austur yfir Mývatns- og Möðrudalsöræfi og á Fagradal en snjóþekja er á Oddskarði. Á Austurlandi er hálka inn til landsins en á köflum snjóþekja með ströndinni.
Nokkur hálka og snjóþekja er einnig á Suðausturlandi og með ströndinni.
Á morgun er spáð norðan 15-23 m/s, hvassast verður suðaustantil. Snjókoma eða él, en þurrt að kalla sunnan- og suðvestantil. Frost 0 til 8 stig.