Innlent | mbl | 5.2.2015 | 14:14 | Uppfært 15:23

Mál Ólafar kornið sem fyllti mælinn

Dagur B. Eggertsson, borgarstjóri, og Bryndís Haraldsdóttir stjórnarformaður Strætó bs. á fundinum í dag. mbl.is/Golli

„Þetta hefur ekki gengið eins og þetta á að ganga. Við vorum að vona að þetta væri að batna en þetta tilvik í gær er einfaldlega svo alvarlegt að við töldum óumflýanlegt að svona yrði stigið inn í,“ sagði Dagur B. Eggertsson, borgarstjóri, á neyðarfundi um mál ferðaþjónustu fatlaðs fólks í ráðhúsi Reykjavíkur í hádeginu.

Borgarstjóri fundaði með bæjarstjórum á höfuðborgarsvæðinu og stjórn Strætó og gengið var frá myndun neyðarstjórnar yfir ferðaþjónustu fatlaðra undir stjórn Stefáns Eiríkssonar, sviðsstjóra velferðarsviðs með aðild fulltrúa Öryrkjabandalagsins, Sjálfsbjargar og Þroskahjálpar.

Með þessu á að bregðast við máli sem upp kom í gær þegar Ólöf Þorbjörg Pétursdóttir, átján ára þroskaskert stúlka, týndist í um sjö klukkustundir. Fannst hún í læstum bíl á vegum ferðaþjónustu fatlaðra undir kvöld.

Dagur neitaði því ekki á fundinum að fara hefði mátt fyrr í aðgerðir sem þessar, en þar sem það hafi ekki verið gert fyrr en nú sé notast við aðferðafræði krísustjórnar. Þá segir hann mál Ólafar hafa verið kornið sem fyllti mælinn.

Skipunartími stjórnarinnar verða fjórar vikur, en meginhlutverk hennar er að tryggja örugga og eðlilega þjónustu og framkvæmd ferðaþjónustu fatlaðs fólks eins fljótt og kostur er. Stjórnin hefur fullt umboð til að gera tillögur um breytingar á fyrirkomulagi eða framkvæmd þjónustunnar til framtíðar.

Auk Stefáns Eiríkssonar munu Þorkell Sigurlaugsson, Bryndís Haraldsdóttir, Guðlaug Kristjánsdóttir, Guðjón Erling Friðriksson sitja í stjórninni. Starfsmaður stjórnarinnar verður Jóhannes Rúnarsson.

Stjórnin hefur fullt umboð til að gera þær breytingar sem hún telur nauðsynlegar til að bæta úr í þjónustu og framkvæmd. Stjórnin hefur einnig fullt umboð til að gera tillögur um breytingar á fyrirkomulagi eða framkvæmd þjónustunnar til framtíðar. Farið verður í óháða úttekt á aðdraganda, innleiðingu og framkvæmd ferðaþjónustu fatlaðs fólks hjá Strætó. Þá verði sérstök úttekt gerð á alvarlegu máli Ólafar Þorbjargar Pétursdóttur.

Með þessu er verið að taka undir hugmyndir sem komið hafa fram á síðustu dögum um óháða úttekt á ferðaþjónustu fatlaðs fólks og að sérstök stjórn með aðkomu hagsmunaaðila komi að málinu. Lagt er til að erindisbréf stjórnarinnar verði gefið út á mánudaginn nk. og lagt fram til staðfestingar á stjórnarfundi SSH.