Matvælastofnun bar að koma niðurstöðum rannsóknar sem sýndi að ekkert kjöt var að finna í kjötböku Gæðakokka árið 2013 á framfæri. Kjartan Hreinsson, sérgreinadýralæknir stofnunarinnar, segir hana ekki telja að framleiðendur hafi svigrúm um innihald matvæla þrátt fyrir að sýknað hafi verið í málinu.
Héraðsdómur Vesturlands sýknaði fyrirtækið Kræsingar, sem áður hét Gæðakokkar, af ákæru um að hafa brotið gegn lögum um matvæli og reglugerðum með því að hafa framleitt nautabökur með röngum upplýsingum á umbúðunum. Rannsókn sem fyrirtækið Matís gerði á kjötbökum frá Gæðakokkum leiddi í ljós að ekkert kjöt var að finna í þeim.
Dómurinn taldi ekki ástæðu til að vefengja niðurstöður Matís og taldist því óumdeilt að bökurnar hafi ekki innihaldið neitt nautakjöt. Það var hins vegar talinn annmarki á rannsókn málsins að fleiri bökur hafi ekki verið rannsakaðar til að taka af öll tvímæli um að um óhapp hafi verið að ræða. Þar sem ekki hafi verið hægt að útiloka það var fyrirtækið sýknað af ákærunni.
Matvælastofnun lét taka sýni úr unnum kjötvörum í kjölfar hrossakjötshneykslisins sem kom upp í Evrópu í ársbyrjun 2013. Þegar í ljós kom að ekkert kjöt var í nautaböku Gæðakokka birti stofnunin frétt um þá niðurstöðu og aðrar á vefsíðu sinni. Niðurstaða héraðsdóms kallar því á spurninguna hvort að Matvælastofnun þurfi að breyta vinnubrögðum sínum ef rannsókn á einu sýni telst ekki fullnægjandi fyrir dómstólum.
„Ég á ekki von á því að við breytum verklagi sérstaklega út af þessu. Þetta var sýni sem var tekið af markaði eins og varan var boðin neytendum. Tilgangurinn var að kanna hvort að hrossakjöt væri notað í stað nautakjöts. Síðan var sýnið sent til rannsóknar með bestu þekktu aðferðum og niðurstaðan er eins og hefur verið lýst þannig að ég á ekki von að við breytum því neitt. Matvælastofnun kom upplýsingunum á framfæri til Heilbrigðiseftirlits Vesturlands sem hefur eftirlit með Gæðakokkum og fylgdi málinu eftir,“ segir Kjartan spurður að því hvort að Matvælastofnun þurfi að breyta
Matvælalöggjöfin snúist um öryggi neytenda og að þeir fái það sem þeir haldi að þeir séu að kaupa. Framleiðandi beri alltaf alla ábyrgð á vörunni og að innihald hennar sé í samræmi við merkingar. Matvælastofnun hafi fengið þessar niðurstöður út úr rannsókn Matís og henni hafi borið að koma þeim á framfæri.
Dómurinn í málinu vekur einnig upp þá spurningu hvort að framleiðendur matvæla hafi þá einhvers konar svigrúm hvað varðar innihald þeirra. Kjartan segir að Matvælastofnun telji þó að svo sé ekki.
„Við teljum að það sem er merkt á umbúðum eigi að vera í vörunni. Það er þá allavegana ekki svigrúm til að hafa það alls ekki í henni,“ segir hann.
Það sé óháð því hvort að um óhapp hafi verið að ræða eða ekki.