Skil óveðurslægðar fara yfir landið úr suðvestri í dag. Henni fylgir hvass vindur og hríðarveður nánast um allt land. Suðvestanlands er vaxandi vindur og versnandi skyggni einkum á fjallvegunum, en á láglendi blotar um og fyrir hádegi og batnar skyggnið þá.
Gera má ráð fyrir hríðarveðri meira og minna fram á kvöld á Hellisheiði, í Þrengslum og á Mosfellsheiði. Reikna má með hviðum á Kjalarnesi, 30-40 m/s og einnig undir Hafnarfjalli með morgninum.
Austur undir Eyjafjöllum og í Mýrdal hvessir mjög skömmu fyrir hádegi og þar verða hviðurnar allt að 40-50 m/s síðar í dag sem og í Öræfasveitinni þar sem einnig má gera ráð fyrir sandfoki.
Sérstök athygli er vakin á því að á Reykjanesbrautinni er reiknað með mjög hvössum hliðarvindi, á milli kl. 14 og 17 að telja. Veðurhæð þá 22-25 m/s og allt að 35 m/s í hviðum.
Röskun hefur verið á innanlandsflugi í morgun. Næst verður athugað með flug Flugfélags Íslands til Akureyrar og Ísafjarðar kl. 10.30 og flug Ernis á Bíldudal kl. 11.30.
Færð á vegum
Það er hálka og éljagangur á Hellisheiði og í Þrengslum en hálka og skafrenningur á Sandskeiði. Snjóþekja og einhver ofankoma víðast á Suður- og Suðvesturlandi. Þæfingsfærð og Óveður er á Kjalarnesi. Hvassviðri er með Suðurströndinni eins og undir Eyjafjöllum.
Á Vesturlandi er hálka og hálkublettir. Hálkublettir og óveður er við Hafnarfjall en þungfært og stórhríð er á Fróðárheiði.
Hálka eða snjóþekja er á vegum á Vestfjörðum og sumstaðar éljar og skefur á fjallvegum.
Á Norðurlandi er hálka, hálkublettir eða snjóþekja og víða skafrenningur. Snjóþekja og skafrenningur er á Öxnadalsheiði og skafrenningur og éljagangur mjög víða á Norðausturlandi.
Hálka og snjóþekja er á Austurlandi. Snjóþekja er á Fjarðarheiði, Vatnskarði eystra og Oddskarði en hálka á Fagradal. Hálka og hálkublettir eru með suðausturströndinni