Ótíðin í vetur hefur haft áhrif á ferðir erlendra ökumanna á bílaleigubílum líkt og aðra ökumenn í umferðinni.
Dæmi eru um að ferðamenn hafa orðið að skilja bílana eftir, fasta í snjósköflum, í miðjum sandstormi og með brotnar rúður. Þá hafa bílarnir fyllst af snjó og verið sandblásnir og hægara sagt en gert að hreinsa þá.
Einna versta veðurskotið í vetur kom sl. sunnudag en þá lentu erlendir ferðamenn í hrakningum á Sólheimasandi; í hávaðaroki, sandbyl og skafrenningi. Samkvæmt upplýsingum frá bílaleigunni Hertz skemmdust þrír bílar á þeirra vegum; einn fór út af veginum og í tveimur brotnuðu rúður. Bílar frá Bílaleigunni Höldi fengu einnig að kenna á veðurhamnum á Sólheimasandi.