Spáð er sterkum vindstreng á Vestfjarðakjálkanum í dag og líklega nær hann inn á Snæfellsnes einnig, að sögn veðurfræðings á Veðurstofu Íslands. Gert er ráð fyrir hríðarveðri á Vestfjörðum.
Ekkert ferðaveður verður því þar í dag og ekki fyrr en síðdegis á Snæfellsnesi. Gert var ráð fyrir að veðrið gengi niður á Vestfjörðum í kvöld.
Bakvakt var hjá snjóflóðaeftirliti Veðurstofunnar í nótt og fylgst grannt með ástandi mála. Vitað var að töluverð snjóflóðahætta var til fjalla á norðanverðum Vestfjörðum. Í gærkvöld var ekki talin vera snjóflóðahætta í byggð á norðanverðum Vestfjörðum.
Súðavíkurhlíð var lokuð í nótt vegna snjóflóðahættu. Meta átti stöðuna þar nú í morgun, að því er fram kemur í Morgunblaðinu í dag.