Bygging hofs hefst eftir sólmyrkva

Fyrsta skóflustungan að hofi Ásatrúarfélagsins í Öskjuhlíð í Reykjavík verður tekin um leið og sólmyrkvi verður um garð genginn í fyrramálið.

Að sögn Ásatrúarfélagsins er þetta fyrsta höfuðhof sem rís í Evrópu í nærri þúsund ár.

Sérstök athöfn hefst á byggingarsvæðinu í Öskjuhlíð klukkan 8.38 við upphaf sólmyrkvans og verða þá mynduð táknræn vébönd, kveikt á kertum í höfuðáttum og staðarvættum blótað. Þegar myrkvinn nær hámarki klukkan 9.37 verður kveiktur eldur á þeim stað þar sem helgidómurinn rís.