Ragnarök, keppnislið roller derby á Íslandi, laut í lægra haldi fyrir norska liðinu Oslo Tiger City Beasts, en liðin mættust í Hertzhöllinni á Seltjarnarnesi í dag. Enduðu leikar 130-252 fyrir þeim norsku.
Þetta var einungis í annað skipti sem roller derby leikur er spilaður hér á landi, en í októbermánuði síðastliðnum lék íslenska liðið gegn hinu franska Les Morues.
Roller derby er hröð snertiíþrótt sem er spiluð á hjólaskautum, en markmið leiksins er að skora sem flest stig með því að hringa andstæðinginn.
Vinsældir íþróttarinnar hafa farið ört vaxandi hér á landi sem og annars staðar. Nokkur nýliðanámskeið eru haldin á hverju ári og var svo mikil aðsókn síðast að vísa þurfti fólki frá. Íþróttin er, eins og áður sagði, spiluð á hjólaskautum og eru aðallega konur sem spila hana, þó svo að karlaliðum hafi farið fjölgandi undanfarið um allan heim.
Fylgjast má með Roller Derby Ísland á Facebook.