Hæstiréttur staðfesti á föstudag úrskurð Héraðsdóms Reykjavíkur í Aurum-málinu svokallaða, en héraðsdómur hafnaði beiðni verjenda sakborninga um að tveir af dómendum í sakamálinu skyldu gefa skýrslu fyrir héraðsdómi í tengslum við rekstur málsins fyrir Hæstarétti.
Fram kemur í dómi Hæstaréttar, að það standi „engin heimild til að leiða fyrir dóm til skýrslugjafar dómendur sakamáls til að beina til þeirra spurningum um meðferð þess. Þegar af þessari ástæðu verður hinn kærði úrskurður staðfestur.“
Verjendur sakborninga, þeirra Jóns Ásgeirs Jóhannessonar, Lárusar Welding og Bjarna Jóhannessonar, vildu að teknar yrðu vitnaskýrslur af dómsformanni og meðdómsmanni sem sýknuðu þá fyrir Héraðsdómi Reykjavíkur í fyrra.
Þeir vildu meðal annars að tekin verði skýrsla af meðdómsmanninum Sverri Ólafssyni sem saksóknari heldur fram að hafi verið vanhæfur í málinu. Sverrir er bróðir athafnamannsins Ólafs Ólafssonar sem var sakfelldur í Al Thani-málinu fyrr í þessum mánuði. Í kjölfar dómsuppkvaðningar í júní í fyrra sagði Sverrir í samtali við fréttastofu RÚV að hann tryði því ekki að sérstakur saksóknari hefði ekki vitað af tengslunum, en ummælin eru eftirfarandi:
„Ég trúi ekki í eina sekúndu að sérstakur saksóknari hafi ekki vitað af mínum tengslum strax í upphafi. Ef hann vissi ekki af mínum tengslum, þá ber það vott um afskaplega léleg og yfirborðskennd vinnubrögð. Mér finnst viðbrögð hans, sko, hæpin og mér finnst þetta bera vott um örvæntingafullar og jafnvel óheiðarlegar aðgerðir. Og hann grípur til þeirra á erfiðum tímum þegar að trúverðugleiki hans stofnunar er eiginlega í molum.“
Saksóknari hefur farið fram á að Hæstiréttur ómerki dóminn vegna vanhæfis Sverris. Málflutningur fer fram fyrir Hæstarétti 13. apríl nk.
Jón Ásgeir, Lárus, Bjarni og Magnús Arnar Arngrímsson voru á síðasta ári sýknaðir í Héraðsdómi Reykjavíkur í málinu en sérstakur saksóknari fór fram á sex ára fangelsi yfir Lárusi og fjögurra ára fangelsi yfir þeim Jóni Ásgeiri, Magnúsi Arnari og Bjarna. Magnús Arnar gegndi starfi framkvæmdastjóra fyrirtækjasviðs Glitnis og Bjarni var viðskiptastjóri sama banka. Lárus er fyrrverandi forstjóri Glitnis banka og Jón Ásgeir einn aðaleigandi bankans.
Ákæra sérstaks saksóknara snýst um félagið Aurum Holdings Limited sem áður hét Goldsmiths, Mappin & Wepp og WOS. Í málinu voru ákærðir þeir Lárus, Jón Ásgeir, Magnús Arnar og Bjarni fyrir umboðssvik eða hlutdeild í umboðssvikum vegna sex milljarða króna lánveitingar Glitnis banka til félagsins FS38 í júlí 2008. Lánið var veitt til að fjármagna að fullu kaup FS38 ehf. á 25,7% hlut Fons hf. í Aurum Holdings Limited.