Hálkublettir eru á Hellisheiði og í Þrengslum, og hálka eða hálkublettir á Suðurlandi, einkum á útvegum. Þá er sumstaðar jafnvel þæfingur eða þungfært á sveitavegum. Þetta kemur fram í tilkynningu frá Vegagerðinni.
Þar segir í ábendingu frá veðurfræðingi að búast megi við norðanátt og snjókomu og skafrenningi um norðaustan og austanvert landið í dag og fram á kvöld.
Í tilkynningunni segir einnig:
Á Vesturlandi er víða hálka eða hálkublettir á vegum en snjóþekja á Laxárdalsheiði. Hálka og skafrenningur er á Holtavörðuheiði.
Hálka eða snjóþekja er á flestum vegum á Vestfjörðum. Snjóþekja og skafrenningur er á Steingrímsfjarðarheiði og Þröskuldum.
Það er víðast hvar hálka eða snjóþekja á Norðurlandi og éljagangur nokkuð víða, einkum á Norðausturlandi. Skafrenningur er á Vatnsskarði og á fjallvegum fyrir austan Eyjafjörð. Þæfingsfærð er á Hólasandi.
Á Austurlandi er víða hálka eða snjóþekja á vegum og skafrenningur og blint á fjallvegum. Þungfært og skafrenningur er nú á Fjarðarheiði og á Vatnsskarði eystra og þæfingsfærð og snjókoma á Borgarfjarðarvegi. Á Fagradal er snjóþekja og skafrenningur og skafrenningur og þæfingsfærð á Oddskarði. Snjóþekja, hálka eða hálkublettir eru með suðausturströndinni.
Ásþungi
Vinna við brú við Þrastalund
Vegna vinnu við brúargólf á brúnni yfir Sogið við Þrastalund er önnur akreinin lokuð en umferð er stýrt með ljósum. Reiknað er með að vinnan standi yfir til 20. júní.