Sauðfjárbændur vilja að íslenskt lambakjöt verði viðurkennt sem þjóðarréttur Íslendinga. Tillaga um að fela stjórn samtakanna að vinna að þessu var samþykkt á nýafstöðnum aðalfundi.
Þórarinn Ingi Pétursson, formaður Landssamtaka sauðfjárbænda, segir að eftir sé að skoða hvernig þessari samþykkt verði hrint í framkvæmd.
„Þetta er ein af þeim skemmtilegu tillögum sem komu frá aðildarfélögunum. Við munum fylgja þessu eftir,“ segir Þórarinn í umfjöllun um mál þetta í Morgunblaðinu í dag og nefnir að kanna þurfi hjá einhverju ráðuneytanna hvort hægt sé að fá slíka viðurkenningu.